政情：自製文宣教防疫 連桷璋犧牲色相
武漢肺炎疫情擴散，唔少議員都教吓大家點樣防疫。而大埔區議員連桷璋仲「犧牲色相」，不顧一切「跳」落馬桶，莫非打算用另類方式教大家防疫？
佢唔係真係跳落馬桶，只不過係佢設計嘅其中一個文宣啫！本身係廣告人嘅連桷璋好鍾意設計文宣，佢日前喺社交平台發圖，其中一張文宣圖片就係將自己掟落馬桶，藉此呼籲大家用一比九十九嘅漂白水清理U形渠，減少細菌孳生，仲提醒大家沖廁所前記得冚蓋。
網民糾正倒漂白水謬誤
宣傳防疫知識係好事，但倒漂白水落U形聚水器就唔一定係正確方法啦！有網民就留言，話香港大學感染及傳染病中心總監何栢良，先前建議市民每日倒清水入U形聚水器，但就強調千祈唔好倒稀釋漂白水，否則會嚴重污染環境㗎，何栢良仲話如果U形渠有損毀，會失去應有嘅功能添！唔知連桷璋今次算唔算好心做壞事呢？