政情：醫護存分歧 梁栢賢籲團結抗疫
本港確診武漢肺炎嘅個案愈嚟愈多，搞到全城恐慌之餘，仲有部分醫護人員以罷工形式，要求政府封關添！醫院管理局前行政總裁梁栢賢（PY）日前就喺社交平台發文，話「抗疫的唯一出路是團結」，有部分網民就好認同啦，但亦都有人叫佢幫手呼籲政府封關喎。
喺○三年沙士時任衞生署副署長嘅PY，佢曾經講過話沙士一「疫」最難忘，又話不論位處邊個崗位「條命都是做應急危機處理」，而喺舊年七月底，佢退休離開醫院管理局，當時曾經寄語接任人話醫護之間需要互信，但如今醫護之間意見都各有分歧，唔知佢點諗呢？
網民求幫手叫政府封關
喺PY個Post出咗街之後，惹起唔少網民討論，意見紛紜。當中唔少網友認同PY所言，話支持團結抗疫、又話盡忠職守係工作上最基本嘅原則；但亦都有網友留言，話跪求PY出嚟幫手呼籲政府封關。
香港再次面臨傳染病嘅威脅，喺咁危急嘅情況下，唔知PY會唔會出番嚟，再次同醫護人員並肩作戰呢？