政情：區會開得成 皆因有官到場？

民政專員：問番新聞組

北區區議會當日有衞生防護中心總監到場，民政署解釋因當日講暉明邨做隔離檢疫中心較為緊急，所以派員支援。咁元朗區議會尋日亦順利召開特別會議，亦有多個部門嘅官員出席，包括食環署、房署、運輸署、社署同教育局等。會後，我哋問當區民政事務專員袁嘉諾，點解有民政署嘅支援？佢反叫我哋問番新聞組。

民政署回覆話基於公眾健康及安全理由，民政署已就喺呢個星期內召開會議嘅次數同時限向區議會提出建議，並指出相關討論議程亦應只針對同疫情有關並屬緊急性質，務求減低疫情擴散的風險，而署方會依循同一標準處理各區議會的會議。

呢兩個區議會開得成，共通點係有官到場，令人質疑係咪有官到就有會開。但元朗區議會係咪因為有官到場，民政署先提供支援，署方就冇答。