政情：唔介意躝屍趷路 鄭若驊拖鞋照收

我哋向政府查詢二○一九年度各問責官員收禮嘅情況，發現多位高官保留嘅禮物大部分都係書本，更有部分官員冇保留任何禮物。

鄭去年收74份禮 吊墜惹疑

喺三司十三局嘅官員中，鄭若驊喺舊年共收到七十四份禮物（見附表），保留咗其中二十一份，而佢更係「連拖鞋都唔放過」。根據律政司提供嘅紀錄，鄭若驊喺舊年五月份嘅一個晚宴，收到並保留一對拖鞋。本來喺晚宴送拖鞋已經好罕見，而送拖鞋更係寓意「送走」，未知係咪蓄意惡搞鄭若驊呢？此外，喺一次面談中，鄭更接收並保留一個吊墜，但收禮紀錄並冇清楚列明送禮人同禮品嘅價錢。話時話，吊墜嘅價值可大可小，難免惹人質疑。

連續兩年 陳茂波「收禮之首」

財政司司長陳茂波喺一八年已經係「高官收禮之首」，當年收禮逾二百份，而一九年亦係排榜首，共收到一百五十四份禮物，較一八年少逾五十份。佢保留咗其中二十三份，包括兩幅書法同一條領呔，兩份禮物均係喺會面中收到嘅。陳茂波亦收到唔少特別嘅禮物，包括書法用具、飛機模型、鞋套同公事包等，但呢啲並冇保留。

喺翻查各高官收禮紀錄後，發現唔少官員亦有收到酒。當中保安局局長李家超收到一瓶威士忌；陳茂波收到香檳、白酒同紅酒各一支；商務及經濟發展局局長邱騰華亦收到兩支紅酒，但三位司局長都冇保留啲酒，唔知係咪「貪湯」、前廉政專員湯顯明早年引發爭議嘅事件，前車可鑑呢？

財經事務及庫務局局長劉怡翔就最為「好學」，共收到二十二份禮物並保留咗其中十八份，當中有十四份禮物係書籍，合共收到二十八本書。另外，有唔少官員就「小心駛得萬年船」，冇保留任何禮物，包括政務司司長張建宗、運輸及房屋局局長陳帆、教育局局長楊潤雄、民政事務局局長劉江華、食物及衞生局局長陳肇始、環境局局長黃錦星、勞工及福利局局長羅致光、發展局局長黃偉綸同李家超。