中環出更：可重用口罩待檢測 鍾國斌即試戴
武漢肺炎來勢洶洶，依家市面上一罩難求，市民四圍撲口罩，仲要喺商店通宵排隊。紡織及製衣界議員鍾國斌（Felix）早前話業界研究推出防菌可洗再用嘅口罩，而口罩嘅樣辦已完成，佢仲上載咗Facebook（Fb），第一時間試戴畀大家睇添！
將派六千個予長者及弱勢社群
Felix尋日出席網台節目時都話可重用口罩嘅樣辦做好咗，但未有得睇實物住，事關要先拎去隔離，等緊拎去化驗同埋做測試。佢仲話有唔少人主動搵佢，話可以幫手生產同消毒，到時會有三間香港嘅工廠會幫手生產，預計可以喺兩星期內生產六千個口罩，到時打算會免費派畀啲長者同弱勢社群。
但事隔幾個鐘頭，佢就喺Fb上載照片，話防菌可洗再用「布口罩」樣辦完成，正安排生產同認證，希望盡快推出，可解決口罩短缺問題，仲即時試戴口罩添！
對於香港理工大學早前都發表聲明澄清，話受香港紡織及成衣研發中心（HKRITA）委託研發防菌物料，主要係防細菌同霉菌，暫未有數據驗證該物料可有效防病毒，Felix就解釋話依家冇證據可以證明，任何一種口罩可以防到病毒，主要都係防飛沫，而且相關布料喺二○一五年時開始研發，當時都冇呢啲病毒，而且只係測試細菌。
卓妮