中環出更：劉玉蓮飲中藥學針灸抗疫
農曆新年本來應該喜氣洋洋，但今年就似乎變得冷清清嘞，事關武漢肺炎襲港，個個外出拜年嘅都會戴口罩，或者轉電子拜年，卓妮早前喺沙田馬場見到離島區議員主席余漢坤（Randy）同太太劉玉蓮（Virginia），問佢哋今年農曆新年有冇感覺特別唔同，原來佢哋一家飲緊中藥預防肺炎，最近Virginia仲學針灸添，希望以後可以大派用場，應對疫情咁話。
Virginia本身係時裝設計師，點解會走去學針灸？佢解釋，其實自己學中醫幾年，一直相信中醫可防患於未然，而最近仲開始學針灸添！佢話已經學咗幾個月啦，因為囝囝曾經有濕疹，針灸幾個月之後好番，覺得針灸都好有用，而咁啱呢排又爆發肺炎，Virginia話個中醫師畀咗預防配方，配咗啲藥粉畀佢哋喺冬至開始早晚食用，同時按吓啲穴位咁話，連小朋友都要飲o架！至於防疫用品，好似口罩、搓手液等屋企本身都有，所以都唔擔心。
王庭聰盡量唔出門 改電子拜年
轉個頭見到香港工商總會主席王庭聰，佢就話新年活動少咗，可以唔出就唔出門o架啦！ 不過好似賀歲賽事呢啲傳統都係要嚟嘅，當然都會捧場喇！
王仲話往年單單年三十晚至年初二幾日，都有大概一、二百人嚟屋企拜年o架，但今年就全部暫停，轉晒電子拜年，仲提到現時自己公司都有同事上內地做嘢，被要求自我隔離，冇得出門，而且內地同香港政府都正努力做隔離等措施，希望各方互相配合努力咁話。
卓妮又遇到香港潮州商會永遠榮譽會長兼當然會董陳幼南同太太，佢哋戴晒口罩入馬場。問起點樣抗疫？陳幼南就話可以留喺屋企嘅就盡量留喇，千祈唔好周圍去，最緊要就係要有充足睡眠，保持身體健康就自然乜嘢事都冇。
卓妮