政情：被咬甩耳 趙家賢3條橡筋戴口罩
呢排好多市民出街都戴上口罩防菌自保，但對於早前遇襲而被人咬甩左耳、最終失去四分之三左耳廓嘅東區區議會副主席趙家賢（Andrew）嚟講，就變成一個難題，究竟Andrew點樣可以戴到口罩，預防感染病毒呢？原來係用咗三條橡筋。
配加長掛帶
話說有太古城街坊分享社交平台某個討論群組內嘅貼文，話有好多網民關心Andrew點樣戴到口罩？謎底終於解開，Andrew前晚喺個人專頁話自己自創用三條橡筋，配上加長掛帶戴上口罩。
唔少網民留言叫Andrew加油，提醒佢要保重身體，注意健康，亦有人欣賞佢就算無咗隻耳仔都一樣積極面對現實，又祝福佢事事順利。
Andrew就話香港人，特別係醫護人員同年輕人都要好好保護自己，同時多謝大家對佢嘅關心。