政情：衞署撤離暉明邨 區議員直播𥄫住
政府早前宣布將暉明邨作為臨時隔離居所，惹來當區居民以堵路同縱火等方式表達不滿。政府之後認衰，宣布放棄採用暉明邨或其他未入伙嘅公屋單位作為隔離場所。衞生署尋日開始將物資撤離，但有北區區議員質疑政府會「求其執走兩舊磚就話撤離完畢」，所以到場視察。
大部分係文件
有該區嘅區議員曾喺社交平台直播暉明邨撤離工作，話驚衞生署「求其執走兩舊磚就話撤離完畢」，又抱怨話區議員都唔畀入內拍攝，仲講笑話「見唔到有人執嘢、違泊就唔少」，唔知係唔係暗寸政府效率低呢？
其後，多名區議員得以進入現場，而喺圖中可見，政府撤離嘅嘢大部分都係文件，裝滿兩架貨Van。但該區議員似乎都仲未放心，發文話「暉明邨今日搬住咁多先，繼續監察！」網上咁多人睇直播，睇怕政府都唔敢再漠視民意啦！