政情：產在疫情蔓延時 陳志豪再添丁
早前都講過，香港廣西社團總會副會長陳志豪（Victor）嘅太太預產期係大年初一，但係遲咗幾日，B仔尋日朝早出世嘞！囝囝重三點五一公斤，母子平安。Victor形容呢次係「產在疫情蔓延時」，個人零舍緊張。
武漢肺炎蔓延，公立醫院最近進入緊急狀態。Victor唔能夠陪產，而太太因為啱啱先至生完B，仲未落得床，亦未可以探佢，再加上太太有啲低燒，所以未出得院，估計仲要留院多一至兩日。Victor又話尋日朝早喺醫院睇BB，都要隔住一道門遠望，而傍晚都只係靠視像同太太通話同見下個B，未抱到囝囝。
驚交叉感染 冇得用「笑氣」
Victor又話，聽太太講，由於擔心交叉感染，所以醫院用唔到「笑氣」，呢次生小朋友就特別痛，佢希望肺炎疫情快啲過去，醫院可以恢復陪產同用番「笑氣」，咁媽媽生B就唔使咁辛苦嘞！
本身育有四歲大仔嘅Victor，細仔出世後，屋企又多個人，變得更熱鬧，大仔亦有個伴陪住一齊成長，早前Victor亦都話想趁住後生追番個女，仲話根據男人嘅直覺，相信下一胎一定會係女嚟嘅。