中環出更：洪光椅談營商之道 靈活唔認輸
香港浸會大學早前頒授榮譽大學院士，表揚對社會作出貢獻嘅傑出人士，當中獲授銜嘅人士包括香港善德基金會副主席企業家洪光椅（大熊哥），基金會主席董吳玲玲同副主席鄭穩偉，當日亦特登到場賀吓大熊哥。
大熊哥喺二十一歲就開始自己創業，當初係做電源變壓器（火牛），自己唔係做開呢行，但對呢方面有興趣，所以邊做邊學，其後因應時代變化，公司開始研發高科技產品，無線充電器同快速充電器等，仲成功打入歐美市場。
問到做人同做嘢嘅態度時，大熊哥話做人要「誠實」、「謙厚」，工作上要「靈活，不認輸」，面對挫敗要從中吸收教訓化為動力，同埋多啲關心員工，喺工作上好好聽吓員工嘅意見。
邱禮濤睇報紙攞靈感
著名導演邱禮濤亦獲頒授榮譽大學院士，卓妮即場捉住佢，問平時點樣攞靈感？佢就話出多啲街，留意身邊事物，即使細微嘅嘢都去觀察吓，同埋睇多啲新聞報紙都好有幫助。咁依家市道唔好，對電影業有冇影響？佢就話一定有，電影業有成百年歷史，生態裏面一定會有高低起伏，從事電影行業人士包括前輩都見慣風浪，無論環境點變都好，電影人嗰團火唔會咁易熄滅。
轉頭見到鄭穩偉，佢係做紙品製造印刷生意嘅，問到公司啱啱上市，喺依家社會咁紛亂嘅環境下有冇受到影響？佢話營商環境係有少少困難，所以公司會跟住社會嘅急速步伐不斷創新去迎合需要，公司十年前已經開始有網上業務，客人可以喺網上落單，減少咗人手處理問題，近年公司仲轉虧為盈，唔同三十年前自己揸住架車做流動辦公室去人客度接訂單喎。
卓妮