政情：議員怕疫害 叫財會唔好開
近日武漢肺炎肆虐，政府早前已宣布公務員留家工作至本周日，立法會秘書處亦作同樣安排。大會雖然二月中先復會，但嚟緊陸續有委員會開會，有民主派議員尋日聯署去信，要求財務委員會主席陳健波取消本周五嘅會議。
財委會將於本周五召開兩個會議，討論多個積壓多時嘅撥款申請。陸續有議員尋日去信要求取消會議，其中一封聯署信指，立法會圖書館、檔案館同餐廳都暫停服務，如果財委會照常開會，議員同助理如有需要都冇得查閱檔案，會影響審議工作，而且牽涉人員都需要出外用膳，會增加疫情傳播風險。
另外，議員鄭松泰都有去信，就話財委會依家審議極具爭議項目，認為難以一時三刻解決，場面亦會容易發生肢體碰撞，建議主席取消會議。
陳健波：未有決定
陳健波接受查詢時就話依家未有決定，但佢提到財委會依家有唔少議案積壓，當中有接近五十項，涉款逾千億，如有議案喺本年度無法處理，需要再排上立法會。佢又話會考慮議員意見、秘書處對會議嘅安排、整體社會嘅利益同埋疫情趨勢先，將會喺今日決定。