政情:張正皓寸黃加慶 隔離營起正民居隔籬

武漢疫情來勢洶洶,政府一度宣布將粉嶺暉明邨徵用為後備隔離設施,引嚟附近居民強烈反彈。北區區議會尋日舉行特別會議,衞生防疫中心總監黃加慶醫生解釋指現時隔離設施有限,故早前政府才考慮改將未入伙公屋作「隔離營」,又承認溝通上可以做得好啲,但就繼續成為一眾區議員嘅箭靶。

黃解釋設施不足 承認溝通差

會上唔少區議員都狠批政府遲遲未有全面封關,從源頭堵截輸入個案,當中鬧得最狠嘅要數北區連線張正皓。佢發言時就引述黃指「隔離設施有限」,反指其實醫院病床都好有限,寸黃點解唔建議政府全面封關?而黃早前解釋「隔離營」一詞只不過係英文「quarantine camp」嘅翻譯,但就被張反指自己英文差,話不如講番中文,仲反問黃知唔知「隔離」點解?張仲寸黃「隔離」嘅意思係「隔開」,而唔係起正民居「隔籬」。

張又提到黃係愛滋病專家,仲話黃教市民預防愛滋病時,都會叫人要用安全套、做足防護措施,反指政府只決定局部封關猶如造成漏洞,仲引述黃指「疾病唔會等人」,繼續炮轟政府點解到依家都唔肯落實全面封關。

另外,會上有議員提出五個臨時動議,包括要求政府立即封關,以及就暉明邨事件公開道歉等,均獲在席議員一致通過。

第一手消息請下載on.cc東網iPhone/iPad/Android/Windows Phone Apps