政情：派湖北口罩 蔣麗芸遭鬧爆
依家市面上出現恐慌性搶購口罩，但係一罩難求。議員蔣麗芸（Ann）早幾日就落街派口罩，點知就畀人發現嗰批口罩嚟自疫情最嚴重嘅湖北省，網民質疑衞生有問題之餘，仲鬧佢大整蠱添！
有網民喺社交平台上載咗圖片，話阿Ann同黨友李慧琼以政黨名義，早幾日落區將口罩放入大廈信箱，點知市民拎到口罩後反轉一睇，原來啲口罩係疫情嘅重災區、湖北製造嘅！網民鬧爆係大整蠱、民建聯最冇腦、「唔戴未必死、戴咗死×硬」等字句，相關圖片仲喺網上瘋傳。
回應稱獨立包裝 衞生無礙
我哋問番阿Ann，佢承認批口罩係嚟自湖北省，製造日期喺舊年嘅三月份，今個月八號預訂，而喺十八號到港，全部都係獨立包裝，唔擔心有衞生問題。佢仲話呢二萬個口罩都係自費，主要派畀老人家，又形容攻擊佢嘅網民係「唯恐天下不亂」，話自己已經盡能力辦事，直言「如果大家驚，咪就唔好戴囉」！