中環出更:攀完獅子山 黎志偉:下一站摩天大樓

多年前因車禍而下肢癱瘓,綽號「包山王」嘅攀石運動員黎志偉,留醫時為親睹自己孩子出世,決定一洗頹風,從人生低谷再度出發,克服困難不斷向目標邁進,而佢坐住輪椅都要攀上獅子山嘅經歷更拍成電影添!

車禍致半癱 為人父後洗頹風

黎志偉下一個挑戰嘅目標就係香港嘅摩天大樓。但要完成呢個夢想,唔單止要有充足嘅準備,亦要事先徵得大廈業權人嘅同意,佢話正同相關對口單位商討中,待有結果就會公布攀登邊座摩天大樓。佢嘅堅毅精神,亦成為第六屆青年夢想實踐家嘅表揚對象。

王鎮炎克服侏儒症 打羽毛球

殘疾人羽毛球運動員王鎮炎亦係得獎人之一。患上侏儒症嘅王鎮炎,雖自小就熱愛打羽毛球,然而身高較同輩友人矮咗一大截,唔公平嘅較量自然令佢屢屢輸波,心灰意冷惟有埋首書本專心學業。後來佢遇上一位前港隊球員,喺對方嘅鼓勵下重拾童年夢想,加入殘疾人羽毛球隊接受訓練,如今已進身單打世界排名第五,佢話同其他運動員一樣,終極夢想就係四年一度嘅奧運會。

同場仲有失去左臂嘅岑幸富,堅持用義肢拉小提琴,而佢永不言棄嘅精神令業餘小提琴家林浩賢感佩服。

當晚恒生大學校長何順文、青年夢想實踐家協會會長陳永明、傑青吳俊霆同太太何淑玲都有出席頒獎禮。求學時期已經係電影迷嘅青年夢想實踐家協會創辦人暨主席李嘉俊,佢嘅夢想就係有朝一日能手執導演筒,親手炮製屬於自己心意嘅電影作品。為拉近夢想嘅距離,佢報讀同電影相關嘅課程,又從事媒體科技以累積經驗同資金,佢認為只要有決心同良好計劃,就算要顧及現實生活,實現夢想亦並非遙不可及。

第一手消息請下載on.cc東網iPhone/iPad/Android/Windows Phone Apps

卓妮