政情：八網難逃：梁福元學乖 種炮仗花驅瘟
俗語有話「爆竹一聲除舊歲」，雖然香港法例列明禁止非法藏有同燃放煙花爆竹，但農曆新年仍然有市民偷偷地放爆竹，唔少新界圍村仲繼續保留呢種傳統添！十八鄉鄉事委員會前主席梁福元就學乖，決定唔放爆竹，用另類方法為大家驅除瘟疫喎。
網上講解燒爆竹習俗
根據香港法例第二百九十五章危險品條例第六條，非法藏有煙花爆竹嘅最高刑罰係罰款二萬五千元同監禁六個月。雖然香港有相關法例監管，但新界地區唔少圍村都會依舊照放。
梁福元就變「乖仔」，喺社交平台上載照片同貼文，話相傳古有「年獸」為患，每每喺除夕到處作惡，後來有人就用紅紙、大鑼大鼓同燒竹嘅巨響驅走年獸，引伸至每逢過時過節都有燒爆竹嘅習俗，而時至今日香港已經立例禁燃鞭炮，所以提早種炮仗花代替，期望為大家驅除過去一年嘅種種穢氣同埋招來吉祥。
佢喺文中提及，話武漢肺炎來勢洶洶，呼籲大家注意個人衞生之餘，仲同大家拜個年。依家疫情嚴重，大家都做好防禦措施喇！