政情：岑智明感嘆終於有番冬天

氣候暖化影響全球，香港嘅冬天亦愈嚟愈暖，正當大家都諗住香港冇冬天，適逢農曆新年，本港受東北季候風影響，天氣開始轉冷，天文台喺大年初二發出寒冷天氣警告，天文台台長岑智明日前就喺Facebook（Fb）貼出一張各區氣溫圖，仲感嘆終於有番一日寒冷天氣喇！

喺過去一年，香港天氣異常溫暖，舊年全年平均氣溫達到攝氏二十四點五度，係自一八八四年以嚟最暖嘅一年，亦係天文台有紀錄以嚟寒冷日數最少嘅一年。正當大家都慨嘆香港就嚟冇冬天，呢兩日又變冷嘞！

岑智明日前喺Fb貼圖，見到本港各區天氣都喺十二度以下，港島區大約十一點五度左右，新界就低至十度，都真係幾凍嘞！佢就笑話睇嚟香港冇冬天，仲要等等喇，仲叫大家保重身體。

貼文一出，唔少網民嘅留言都感嘆話終於有冬天喇，仲有人對遲嚟嘅冬天感到依依不捨，寫到「只想與你（冬天）留下永遠相擁抱，而明知，空歡喜，又再苦惱」。認真搞笑，睇嚟市民都知道天氣好快又轉暖，覺得好無奈嘞！