政情：鄭承隆生日捱即食麵 黨友主席 兩日後送暖

阿Dick早前亦喺Fb上載咗張相，貼文話「承隆生日當晚，是一碗冷冷的公仔麵，今晚我們為他送上一點燭光，讓他能以心中暖流，和風對抗。」呢點燭光，其實就係插咗喺一件蛋糕上面，旁邊仲擺咗張生日卡添！

呢個Post出咗街之後，鄭承隆仲留言反駁，話「公仔麵係熱辣辣的」，阿Dick亦留言話：「鄭承隆生日食公仔麵有幾熱呀？」

網友質疑麵底有鮑魚

事緣鄭承隆生日當晚喺Fb貼文，話原來唔少人有興趣佢生日去咗邊度食飯，而喺徇眾要求下，佢就開古，上載咗嗰張相就係即食麵嚟，唔少網友都話唔相信，其中一個網友仲質疑啲麵底下有鮑魚，但事實就係即食麵再加隻蛋。

有啲網友仲驚佢食得太齋，叫佢加條菜同午餐肉，亦有網友話咁都唔錯，少食多滋味，另有網友就話係幸福嘅長壽麵。