中環出更：黃麗嫦：成功女企業家 要凡事親力親為
要做一個成功企業家唔係一件容易嘅事，仲要係女企業家就難上加難。華人女企業家協會早前搞咗個晚宴，出席嘅女士全部都係獨當一面。卓妮喺晚宴上見到香港鐘表業總會顧問黃麗嫦（Esther），問起點樣做一個成功女性？佢話其實同男性冇乜分別，每件事最緊要親力親為。
Esther仲話，佢由細到大都好鍾意藝術，喺鐘錶上都不停加入新元素，有一款錶係用荷蘭一個名畫家嘅畫印落錶一面，做出嚟係好立體好靚，口碑好好。咁出去傾代理時會唔會女性比較蝕底啲？佢話都唔會，男女都冇分別，對方睇你有冇誠意去做好一個品牌比較重要。
細個偷戴珠寶 何美儀長大入行
華人女企業家協會名譽副會長何美儀做開珠寶設計。問到佢點解會入呢行？佢就話細個嗰時受到爸爸薰陶，自己喺屋企仲成日偷戴媽媽啲珠寶首飾當玩具咁玩，當初唔知道原來係咁貴重，幸好冇整唔見，而大個就入咗呢行。佢話當客人要改款式或者設計首飾，完成產品後可以令到客人去接受，睇到佢哋嘅喜悅，呢個係最大嘅樂趣。
出席晚宴嘅仲有香港美容從業聯會副主席謝欣玲、香港國際美容健康總聯合會IBH副主席黃雅麗（Karen）同香港專業髮廊管理協會會長劉玉棠。謝欣玲話細個已經好貪靚，成日去買化妝品用，之後就創立一間美容集團，最滿足係將客人最美麗嘅一面散發出嚟，讓佢哋可以重拾自信，就係自己最大嘅成功感。
至於Karen係開設美容會所，佢話現今香港社會男女已經好平等，就好似美容會所咁，愛美已經唔係女士專利，公司亦多咗好多男性顧客幫襯。
卓妮