政情：話戴口罩無法講嘢 梁卓偉知衰
政府早前就武漢肺炎疫情召開記者會，當時一眾官員同專家冇戴口罩，香港大學李嘉誠醫學院院長梁卓偉仲大大聲話「戴口罩冇辦法講嘢」，此言論惹起外界質疑。其後，佢終於知錯，尋日喺港大醫學院Facebook專頁認衰，就「口罩言論」向公眾致歉。
「為人師表 做錯要認」
梁喺文中承認，當日喺政府記者會上輕率回答有關口罩嘅提問，經反思後認為應該謹慎回答，同埋應準確指出戴口罩嘅目的同重要性，又話「為人師表，做錯就要認」，向市民致歉。
針對現時香港嘅情況，佢話根據目前資料，新病毒嘅傳染威力同沙士相若，擔心病毒會喺香港出現社區爆發，呼籲市民做好「圍堵工作」，以堵截入境個案並將其送至醫院隔離治療。佢又建議市民咳嗽嘅時候，要掩蓋口鼻防止飛沫傳播、外出時要戴口罩同眼鏡，加強自身保護、仲提醒市民注射流感疫苗，話如果發病可以令醫護人員更準確判斷喎。