政情：鼠年官星續無力 旨意政府蛇都死

好多人都關心政府新一年可唔可以成功止暴制亂，能否對抗疫情，楊師傅話，正月立春八字屬丁火命，睇落好似幾硬淨，但今年金土大旺，丁火呢個弱火又點頂得住呢？同去年一樣，今年官星不顯，即係代表政府管治能力不足，加上鼠年嘅「七殺」力度不足，「七殺」正正代表管治威權，管治頭耷耷，無威無勢，真係想有運行都難。

二月易打殺 五月官鬥爭

至於香港鼠年每月運勢，楊師傅話正月運氣都算幾好，但會有病毒傳染。去到二月容易有打打殺殺，情況分分鐘比去年最動盪時期更加差，就算去到三月，社會都會多摩擦、唔穩定，呼籲大家要小心。農曆四月，西南方可能會有地震，五月就比較多官場鬥爭，六月甚至仲有山火及飛機失事添！

八月怨氣多 九月現貴人

去到農曆七月，情況就會有小小反覆，大凶星位於世界嘅東北方，將會再有病毒入侵，交通意外機會都會大增，而香港同內地都喺世界嘅東北，所以大家出門玩要小心啲。踏入八月，楊指屆時已積聚咗好多怨氣，政治鬥爭將會白熱化。慶幸嘅係，好彩九月出現吉星，代表會有貴人出現，惟鬥爭仍然持續。

踏入第四季，情況又會唔會有改善呢？楊話，農曆十月會再出現零星打殺，十一月七赤入中宮，災難多發生於東面，如果想去日本玩嘅朋友要留意喇。撐到年尾十二月，依然有人喺政治上搞小動作。總括而言，楊師傅形容香港鼠年大運差，而且六親無力，冇乜人可以幫到香港，所以奉勸港人自求多福，旨意政府真係蛇都死。

班問責高官民望不斷下滑，仲要低處未算低，可見市民對班高官嘅表現好不滿，而民望長期「墊司底」嘅律政司司長鄭若驊到依家都仲賴死唔走，香港真係想好都幾難。