中環出更：借電競籌款 吳錦青：凝聚未來善長
唔少家長都會覺得小朋友打機唔健康，但又點會諗到依家打機唔單止已變成一項運動，甚至可以係慈善籌款嘅項目？博愛醫院早前舉辦嘅電視籌款節目就以電子競技為主題，主席吳錦青（David）話隨住時代改變，籌款活動都要有新嘗試，仲提到其實電競有唔少好處添！
David話好多電競項目都係團隊遊戲，能夠讓年輕人培養團體精神，仲提到博愛喺天水圍設立咗電競中心，會教年輕人點玩電競可以更健康。佢又講到電競可以成為聚集年輕人嘅平台，等其他人可以好好咁關懷同支持年輕人，仲講笑話慈善團體都需要呢班未來善長、新力量嘅支持咁話喎。
韓嘉軒：最緊要教細路明辨是非
同場仲見到副主席周駿達、總理王陳鴛鴦同韓嘉軒。韓嘉軒講到自己三個小朋友中只有細仔會打機，但佢就提到佢哋由小學開始已建立好一套生活規律，唔會因為掛住打機而夜瞓。佢又話作為父母，最緊要教識小朋友明辨是非，唔好因為擔心小朋友太早接觸一啲事物會學壞而避而不談，反而喺家長指導下等小朋友多啲見識先係最好。
轉頭又見到三位總理吳志雄、王文漢同林世強。林世強就講到，其實電競喺過去十年間發展好快，仲成為二○二四年杭州亞運嘅體育項目添！對於有唔少香港人仲覺得玩電競會玩物喪志，佢就反指就算其他嘅傳統運動，例如係足球都有機會太過沉迷，仲話只要唔沉迷就唔係問題。
觀眾多過NBA 獎金高過足球巨星
林世強又提到電競喺韓國已發展出完善產業鏈，仲吸引到法國奢侈品牌贊助比賽，但最誇張嘅係，依家睇電競比賽嘅觀眾比睇NBA嘅仲要多，而冠軍選手嘅獎金仲高過勝出歐聯嘅足球巨星添！佢仲話依家唔少東南亞國家政府都投放咗唔少資金去開設電競中心以至學校，香港要同佢哋比真係有好大段距離喇！
卓妮