政情：港鐵換事務總監 Linda接替Linda
前政務官蘇家碧（Linda）本月中已離任港鐵公司事務總監，港鐵又委任Linda做同一職位喎。唔通回巢？
當然唔係喇，Linda So本月底就會出任金管局助理總裁（機構拓展及營運），而頂替港鐵事務總監嘅係Linda Choy蔡少綿，佢同時會出任執行總監會成員及公司企業責任委員會成員，由三月二日起生效，服務協議係三年。酬金方面，每年四百一十四萬元，有關金額未包括酌情發放嘅非固定酬金。
蔡少綿曾任環境局政助
Linda So曾做過商務及經濟發展局副秘書長，而Linda Choy亦曾經做過環境局局長政治助理，亦做過傳媒工作，亦喺香港迪士尼樂園度假區擔任多個職位，包括傳訊及公共事務副總裁，佢好積極參與社會及公共服務，依家仲係基金公司主席添！
呢幾年，港鐵遇到好多棘手問題，先係沙中線工程爆出醜聞，反修例風波導致鐵路設施受到嚴重破壞，再加上屯馬線一期又即將正式通車，唔知到時會唔會又爆出乜嘢問題，又使唔使Linda執手尾？