政情：新民黨再添丁 陳志豪喜迎鼠B
新民黨上年繼甘文鋒初為人父之後，立法會議員容海恩前幾日亦已順利誕下B女，喜訊仲接二連三，新民黨準備再添丁啦！同屬新民黨嘅香港廣西社團總會副會長陳志豪（Victor）話大約喺大年初一，屋企就會添多個BB嘞！
Victor話大仔依家四歲啦，而嚟緊即將出世嘅BB，亦都係男仔。佢話本身打算帶老婆去威爾斯親王醫院生B，但最近武漢肺炎嘅確診者被送去威院，所以有啲擔心，依家就考慮緊轉唔轉去私家醫院生B。
大仔已4歲 想追番個女
當被問到會唔會想乘勝追擊，再追番個女？佢就話趁住後生，都想追番個女，仲話根據男人嘅直覺，相信下一胎，一定會喺女嚟嘅。
有湊仔嘅經驗，Victor都打算寫育兒文章，仲連筆名都諗好喇，就話會叫做「佛系爸爸」，表明佢唔會畀太大嘅壓力小朋友。而佢嘅大仔亦都將會升呢做哥哥，Victor話會進行「放養式教育」，之但係佢老婆就驚小朋友細細個會食壞肚，喺飲食方面反而會管得好嚴喎。