政情：甘乃威大鬧係狗 民政專員斥侮辱

話說有民主派區議員早前喺會上，提出譴責警隊同埋警務處處長嘅動議，期間黃何詠詩聯同其他政府代表齊齊離席，之後嘅會議都冇再開添。甘乃威尋日喺特別會議上提出動議，要求嚴肅跟進公務員集體離席事宜，包括以區議會名義向申訴專員投訴、向廉政公署等有關機構舉報等，議案最終亦獲十四位民主派區議員支持而一致通過。

黃何詠詩強調政治中立

甘乃威發言時提到當日仲有其他民生議程，但黃何詠詩都係一去冇回頭，質疑佢點解尋日返嚟，仲直斥「作為政府部門出緊市民嘅糧，係香港市民嘅公僕，唔係林鄭月娥隻狗、扯線公仔」，要求佢唔好再話自己政治中立，其他區議員則多次要求黃何詠詩交代區議員當日有邊句說話帶有侮辱性。

黃何詠詩強調係按公務員守則，係政治中立、不偏不倚，重申冇擅離職守。佢又指政府重視區議會嘅意見，曾與區議會主席就開會狀況作溝通，但會議進行期間卻有區議員多次打斷發言同帶有侮辱性字眼，佢作為政府同議會嘅橋樑，有責任確保議會喺互相尊重同理性嘅情況下討論。至於係乜嘢侮辱性字眼，佢就唔肯講，仲話己所不欲、勿施於人，重申政府立場係尊重事實。但佢舉例指，覺得甘乃威話佢唔係人呢句感到侮辱，但同時又話同甘乃威共事咗四年，覺得佢冇心喎。

講開又講，甘乃威做咗咁多年區議員，又做過立法會議員，冇理由唔知政府官員嘅態度，竟然鬧人係狗，似乎過晒火位喎。

元朗區會討論淚彈成分

會上同時都有三位區議員就武漢肺炎提出動議，批評港府防疫不力，要求加強防疫之餘，甚至要求封閉來往中國內地同澳門嘅邊境添。而另邊廂，元朗區議會尋日亦通過三個動議，其中一個係決定撥款五十萬元購買消毒搓手液同口罩。

此外，元朗區議會亦討論催淚彈成分對人體、動物及社區嘅影響，民主派區議員關注警犬係咪唔應該到現場、同埋清潔工人嘅保護裝備。但警方代表就話保證催淚彈對人體零遺害，但唔肯透露成分，淨係話根據供應商嘅指引，唔會對人體造成永久傷害。