中環出更：轟反對派假民主真獨裁 民眾聯席籲沉默大多數發聲
多名香港大學校友舊年八月發起組織民眾聯席，話係跨組別、跨專業甚至跨年齡嘅，目的係提供一個平台，畀團結理念相同嘅朋友聚埋一齊反對暴力，為未來可預見嘅亂局，出謀獻策，及時採取適當嘅實際行動。民眾聯席召集人趙麗娟（Susanna）仲話，希望聯席可以為下次選舉撥亂反正添！
促登記做選民 盡責投票
民眾聯席尋日召開記者會，出席嘅唔單止有Susanna，仲有三位發言人，包括劉方、林勁放同姚潔凝，期間講到話依家民主派借反修例事件，表面民主實質獨裁，打壓其他意見，仲破壞店舖，阻人上班上學等，行動完全同民主背道而馳。同時又發現香港仍然有一百八十萬人未登記為選民，所以嚟緊會係本月二十九號至五月一號，發起為期九十四日嘅全港十八區選民登記活動。
另外，佢哋仲講到，街站會設係港鐵站附近及交通交匯處，亦都招募咗超過一百名嘅義工幫手，目標希望擴大選民基礎，因為每個公民都有投票責任，當然要參與多啲，相信正義仍然存在咁話，呼籲沉默嘅大多數都會出嚟發聲喇！
卓妮