政情：張建宗狂咳 話飲水濁親
最近大家都好關注武漢肺炎嘅傳播，加上季節性流感，市面上都多咗人戴口罩。署理行政長官張建宗尋日出席行政會議前見記者，就有談及武漢肺炎嘅情況。點知佢一路講一路狂咳，唔通佢都病咗？
陳帆都戴咗口罩
張建宗喺發言時提到市民如果出現上呼吸道感染症狀就要戴口罩，同埋及早求醫，但佢自己就一直狂咳，連把聲都變埋，好似好辛苦咁。佢飲咗幾次水，但都無乜用繼續咳。去到問答環節，有記者就話都見到張建宗咳咗幾次，問佢係咪唔舒服，使唔使都戴番個口罩。記者又話見到運輸及房屋局局長陳帆都戴咗口罩，問佢有冇留意到有政府官員患病？
聽到傳媒咁問，張建宗解釋自己無病，只不過頭先飲水嗰陣濁親，先至會係咁咳。佢又話無留意到同事有冇病，但就話同事個個都好精神，多謝記者關心咁話喎。