政情：立會提款機啟用 陳振英先撳為快
立法會秘書處尋日出電郵通知，位於立法會綜合大樓大堂嘅兩部銀行自動櫃員機已經安裝完成，開始啟用，兩部櫃員機分別屬於香港上海滙豐銀行同中國銀行（香港）。立法會金融界議員陳振英仲先試為快，即日就同同事去櫃員機撳錢。
由自己一手一腳引入
陳振英話立法會多年嚟都無提款機，因為無乜銀行有興趣。佢喺一年前左右開始同立法會秘書處討論加設提款機，親身參與招標工作。既然提款機係自己一手一腳引入，佢梗係要支持吓（口架）喇！佢仲話本身以為提款機會提供新款紙幣，點知都仲係舊款，可能新年會有新銀紙啩！
講到擔唔擔心立法會再被衝擊，提款機隨時不保。佢話依家立法會已經加強保安，佢相信示威者好難再衝入嚟。佢又話提款機都係畀議員同職員用，如果破壞咗都唔知幾時先整得番，希望大家都可以理性啲喇！