政情：開檔寫揮春 葉建源祝「百毒不侵」
喺農曆新年，家家戶戶都貼揮春，立法會教育界議員葉建源尋日一如往年再喺立法會「開檔」，幫其他議員同立法會職員寫揮春。最近唔少市民都好擔心武漢疫情襲港，衞生服務界議員李國麟就「落柯打」，叫葉建源寫番張「和你抗疫」；不過，其實香港暫時都未出現任何確診個案，所以葉建源就另外寫多張「百毒不侵」嘅揮春，祝福每一位香港市民。
葉建源「開咗檔」兩個鐘，已經寫咗逾百張揮春。有部分揮春嘅字句比較新穎，例如「香港好嘢」、「香港平安」，亦都有比較傳統嘅「一團和氣」、「身體健康」。葉建源寫到「鼠年平安」時，仲將個「鼠」字象形化畫咗隻好得意嘅老鼠添！
「尊重民意」贈高官
唔單止寫畀立法會嘅職員同泛民議員，葉建源仲寫咗張「尊重民意」畀一眾高官。至於建制派同事方面，適逢鼠年，葉建源會唔會寫番張畀「鼠王芬」之稱嘅梁美芬？佢口噏噏諗咗陣到底寫「鼠王平安」定「芬……」好，但最後就話諗唔到咁話喎。