政情：區會嗌停小白象 民政署企硬照起

造價逾一億三千萬元的摩頓臺社區活動中心爭議好大，民主派批評既面積細，但每年開支卻逾四百九十萬元，質疑效益低，而有關工程項目經歷咗兩屆立法會同區議會嘅討論，前年十一月終於喺爭吵聲中獲立法會財務委員會通過撥款。

批諮詢不足 街坊無優先權

喺新一屆灣仔區議會內，民主派同政治素人佔多數，未上任就狠批有關工程嘥錢，特別係上屆仲係素人，今屆就升級做區議會主席嘅楊雪盈。喺尋日嘅區議會會議上，楊直指上屆已經批評工程諮詢不足，要拆兩個好多街坊用嘅排球場去起一個迷你禮堂同活動室，仲要區議會同居民都無優先使用權，點睇都應該煞停佢。

民政事務總署助理署長鍾雅之就話，政府已經就有關工程同承建商簽晒合約，所以一定會尊重程序同遵守合約精神，又話就算暫停工程或換承建商，最後都係要起埋佢，所以維持現狀咁起係最慳錢。被問到毀約要賠幾錢，鍾就話自己唔係專業人士答唔到，又指合約無制訂過中止工程要賠幾多錢喎。

入紙問估算賠償 不獲答覆

楊雪盈聽完就忍唔住鬧鍾雅之，話上個月已經入紙問中止工程要賠幾多錢，唔明點解今次開會無數字，佢質疑無估算金額只係一個幌子，政府唔披露合約細節係「不為也而非不能也」，似乎政府想一意孤行咁喎。其後區議會順勢過埋中止活動中心嘅動議，而鍾聽到都無乜反應，似乎係預料之中。

唔單止摩頓臺社區活動中心，涉款五千萬嘅觀塘海濱音樂噴泉亦極具爭議，新一屆區議會喺月初已通過動議，暫停有關工程，而區議會尋日開會亦要求民政署公開合約條款，但民政署代表直頭唔見影，被批評係唔尊重同漠視區議會嘅功能，有議員更加話噴泉係觀塘區常規議程，唔通政府打算避足四年唔回應？

對於兩個區議會分別要煞停活動中心同音樂噴泉嘅工程項目，民政事務局局長劉江華早前回應時只係講咗句會繼續，即係話當局已經企硬唔會停，睇嚟灣仔同觀塘區議會都會繼續咬住唔放。