中環出更：何啟明野狼上身 扮埋工人大肚婆

話想加公僕薪 畀反對派阻住

何啟明尋日喺Facebook上載一條短片，MV一開始，何啟明學足原版《野狼Disco》，着住背心、戴埋安全帽扮地盤工人打畀何啟明議員辦事處，話自己搵唔到嘢做，立法會做唔到嘢就執咗佢喇，仲要講到七情上面，非常肉緊。鏡頭一轉，佢着住粉紅色西裝外套唱歌，頸上掛住條金色彩帶，戴埋黑超，好有八十年代嘅Disco風味。歌詞就話「公務員啊，我都想加你人工啊，在那立法會啊，反對派阻鬼住啊」。

更入戲嘅陸續有來，佢竟然扮大肚婆，拎住個BB公仔唱歌訴苦水「肚裏嘅B，就快要出世o架喇，得嗰十個禮拜點夠我減肥啊？十四周嘅產假，究竟幾時有o架？返工對住老闆，係好慘o架」。唔單止大肚婆，佢仲飾演埋失業嘅打工仔，話自己屋企有老有嫩，希望失業援助基金可以快啲到手。佢話拍片都係希望大家開心吓、輕鬆吓，嚟緊新年笑口常開，同埋希望打工仔可以有更多保障，唔好再畀民主派阻住議案通過喎。

卓妮