中環出更：年廿八洗邋遢 沈豪傑：親自郁手應節
今日係年廿八，傳統係要洗邋遢。卓妮日前喺中環見到元朗區議會前主席、現任區議員沈豪傑同佢爸爸。問起會唔會郁手洗嘢？沈豪傑話梗係有啦！幾忙都要做吓應吓節，就算有工人清潔但佢間房啲私人嘢工人唔會掂，因為有啲文件一扔咗就麻煩，所以唔會假手於人，都係自己清理番好啲。
嗰日沈豪傑同爸爸喺中環置地廣場等車，當時沈豪傑戴住副太陽眼鏡着咗件大褸好搶眼，成個Mark哥咁款，由於當時皇后大道中有交通意外導致大塞車，佢哋足足等咗成廿分鐘司機先到。沈豪傑話今年會喺香港過年，去同朋友親戚拜年，事關過時過節好多人都出晒去玩，香港反而會少啲人。過時過節圍村人係咪要跟足規矩去做？佢話時代唔同冇跟得咁足，咁食團年飯開年飯，去拜年呢啲都會做。
龐盧淑燕一家去英國玩過節
轉頭又見到保良局前主席龐盧淑燕喺中環行街，問佢有冇辦年貨，佢話都冇乜，仲話啱啱先喺北海道玩完返嚟，新年會一家人去英國玩，所以都唔使買啲乜嘢過年。佢仲話新年通常都會一家人出去外地玩順便過埋節。
黃傑龍睇錯字以為換咗假鈔
好多人換新鈔封利是。稻苗學會會長黃傑龍（Simon）日前喺Facebook貼文，話換咗兩疊新鈔，但發現號碼完全一樣，即時個心都驚一驚，以為假銀紙，仲問呢個情況係好難得定係好平常？心水清嘅網友即時話叫佢：「唔好自己嚇自己，英文字母都唔同。」
最近社會動盪，經濟大受打擊，而做食肆嘅Simon都受好大影響。佢話共度時艱唔一定係減人工減福利，而員工喺舊年幫公司渡過唔少難關，所以今年花紅獎金會繼續派，仲增設一個「加油金」，只要係合資格嘅長工都可以得到每人有五百蚊，為員工加油打氣喎。
卓妮