政情：捱過藤條炆豬肉 柯仔堅持左拗
臨近農曆新年，好多政界人士都會落區寫揮春，而立法會議員柯創盛（柯仔）都唔例外，搵埋書法師傅落區寫揮春。咪以為柯仔工多藝熟，原來佢係新手，首次應街坊要求，首次喺人前即席揮毫，寫個「福」字，同時被揭發有童年陰影添！
「處男」寫福 街坊仍捧場
「處男」寫揮春，係咪驚到震騰騰呢？柯仔自言手字雖然比唔上專業嘅書法師傅，但勝在一份心意，而街坊都好捧場，令佢相當「發市」、無停手咁一口氣寫咗幾十張揮春。寫咁多，有冇手軟呀？
有冇手軟就唔知，但佢被揭發係「左拗」嘅，亦令佢諗起童年陰影喎。話說佢自細就習慣用左手寫字，當時柯媽以為佢奇奇怪怪，同其他小朋友唔一樣，就不停對佢施以「藤條炆豬肉」，要佢改番用右手。之但係，最後佢都係改唔到，直到今時今日都係「左拗」。咁又係嘅，諗起都覺得痛。