政情：政爭不絕 窒礙扶貧 劉仲恒籲放下歧見
有新一代公職王之稱嘅劉仲恒，過往擔任香港願望成真基金主席期間，曾致力為病童一償心願，但身為醫生嘅佢，當然係希望所有病人都可以痊愈啦！然而社會上總有不幸嘅人罹患罕見疾病，不但難以根治，且所涉藥物亦非常昂貴。劉仲恒作為扶貧委員會委員，指今年亦同往年一樣，將加大撥款喺罕見病患嘅項目，希望可以為基層家庭嘅經濟壓力起到紓緩作用。
對本屆立會冇期望
此外，關愛基金亦會投放更多資源於過渡性房屋，設法解決居住問題。不過，要濟弱扶貧，難免涉及庫房，而佢就擔心無日無之嘅政治爭拗，妨礙立法會運作，問財委會攞錢嘅難度大增，恐怕對扶貧項目構成不良影響。由於今屆立法會嘅會期已邁向尾聲，劉仲恒相信餘下幾個月，議會嘅狀況唔會有太大改變，惟有盼望新一屆嘅立法會，各方勢力都能夠以民生議題為首，從而放下歧見。
劉仲恒又話願望成真基金每年都喺聖誕前夕，喺中環某商場設籌款櫃位，然而啟動禮則礙於持續多時嘅社會運動，無奈取消，以致籌款成績都打咗折扣，所以佢期待新嘅一年，香港社會能回復祥和。