政情：11億重建泳池 整完隨時唔開

委員會之前嘅會議已選咗由劉國勳做主席，尋日嘅會議一開始就選副主席，泛民議員楊岳橋就提名陳志全（慢必），最後亦喺無競爭下自動當選。

之後隨即就展開議案討論。期間邵家輝就重建九龍仔游泳池質問康文署，話泳池重建後唔單止有室內泳池、室外訓練池同嬉水池，仲有陽光浴場，佢話依家救生員本身唔夠，好多泳池已經開唔足，質問署方過去一年開池比例係點，欠缺幾多人手？

死撐話招人不難 議員鬧爆

康文署助理署長霍李湘玲回應話，招聘公務員救生員並唔困難，而每年四月至十月泳季都會請季節性救生員，但坦言呢啲就流動性高，唔同時間人手都唔同，但為咗加強穩定，已增加聘請八十個救生員，強調之後都會諗方案增加人手。

邵就再講到自己嘅親身經歷，話去泳池游水，有啲泳池逼到爆，插晒針咁，但有啲泳池因為冇救生員唔開得，鬧爆政府攞十一億元，但唔知夠唔夠人，整完又唔開，都真係唔知想點喇！民政事務局局長劉江華見到咁，惟有出面解畫，話人手成日都有變動，依家冇實數，之後會再畀番議員咁話。

重建需4年 拒僅部分維修

另一議員鄭泳舜就質疑泳池重建需時四年咁耐，話係咪真係要全部重建，可唔可以維修部分設施代替，當局就話個泳池一九六四年落成啟用，到依家已經超過五十年，裏面設施相當舊，只維修就未必足夠，而主池設計都唔符合國際規格添，需要一次過重建整體配合去做。

金融服務界議員張華峰就講到話泳池佔地一點三公頃，重建費用需要十一億元，而之前南區包玉剛游泳池就佔地一點六公頃，只需三億幾，質疑造價過貴，加上泳池每年十二月至三月都要維修，維修期咁耐，要暖水池嚟做咩？局方就解釋話包玉剛泳池工程只係將副池轉為暖水池，但呢個就需要拆卸，重新提供一個暖水主池、嬉水池、訓練池同其他輔助設施等，所以係兩樣嘢嚟喎，至於維修期，局方就話會盡量唔使咁耐。