中環出更：司法委員會選出主席 即召鄭若驊解畫
以往喺政府公布《施政報告》後，各政策局都會派官員去立法會嘅事務委員會做簡介。司法事務委員會自十月復會至今已三個月，一直都未選到正、副主席，喺尋日終於選出嘞，隨即就有議員提出，要求人稱「避政司司長」嘅律政司司長鄭若驊上嚟開會簡介《施政報告》。
梁美芬擊敗陳淑莊
司法事務委員會會議一開始，先有候選人質詢環節，隨後進入投票程序，經民聯梁美芬獲二十一票成功連任主席，而公民黨陳淑莊獲十五票落敗，而參與競逐嘅許智峯、譚文豪、郭家麒、張超雄同李國麟就一票都冇。隨後嘅副主席選舉，公民黨郭榮鏗喺無競爭下，自動連任副主席。
喺候選人質詢環節時，人民力量陳志全提到每個事務委員會都有《施政報告》簡介會，關注候選人會唔會開，佢喺選出主席後亦有提出相關意見。另外，郭家麒提到鄭若驊嘅民望係政府中最差、最衰，又指梁美芬好多時畀人當支持鄭若驊、偏幫政府，關注梁會唔會考慮同政府割席？
梁美芬喺主席選舉前，就講明希望鄭若驊上嚟回應，又話過往都有同鄭若驊講希望出席會議，而且亦都會邀請非委員出席發問。喺主席選舉後，佢就話秘書處已同政府溝通過，願意喺議程上作出調動，會先匯報《施政報告》。
卓妮