中環出更：陳家偉帶小朋友行年宵 見識緊要過買嘢
農曆新年臨近，好多市民都會去行年宵，但今年取消咗乾貨攤位，剩低濕貨攤檔，唔知會唔會影響大家行年宵嘅意欲呢？卓妮日前喺沙田馬場見到香港中華廠商聯合會常務會董陳家偉（Calvin），佢話每年都會帶小朋友去見識吓，主要唔係去買嘢，係同佢哋介紹吓農曆新年習俗同文化，就算今年取消咗乾貨攤位，有時間都會帶小朋友行吓咁話。
Calvin話去年宵主要唔係購物，雖然見到得意嘢都會買，但主要係帶小朋友見識吓，好似介紹吓唔同種類嘅花，例如桔唔單止係一盆擺設，可能仲可以食o架，同埋點解新年要擺呢啲花，都會逐一解釋畀佢哋聽，因為行花墟就係一種文化嘢咁話。咁通常會買乜嘢花做新年擺設？佢就話媽媽會幫手買蘭花，因為可以擺耐啲嘞！
陳龍盛習慣買乾貨
菁英會會員事務委員會副主任陳龍盛（Eddy）同太太謝嘉恩都有行花市習慣，仲好鍾意行添，通常都會去幾個年宵市場o架！唔單止會買鮮花，都會買乾貨，好似地氈、吊飾或者公仔，但都係為咗開心而買，同埋見到啲年輕人好落力，就唔理產品係乜嘢o架啦，都想支持佢哋，等佢哋知道創業艱難咁話。不過，Eddy就笑話好多時都買咗唔等使嘅嘢，轉頭就捐咗出去，佢話今年都應該會去，但就睇情況如何，或者提早啲去行喇！
轉個頭見到離島區議會主席余漢坤太太劉玉蓮同媽媽，佢哋屋企好傳統，由細到大都會一大家人一齊去行屯門花市，無論大細，就算BB都會抱住去添，而今年都唔例外，一定會去咁話，湊吓熱鬧，但買嘢就未必喇，因為花一早就準備好，去到都係買啲小食，等小朋友開心吓。
卓妮