政情:抹完公園成桶黑水 譚香文疑淚彈殘留物

最近武漢肺炎搞到人心惶惶,政府經常呼籲市民注意個人衞生。黃大仙龍星區議員譚香文就批評政府唔注重衞生,成日唔清理各公園嘅設施同地墊,佢嘅義工去公園進行義務清理嘅時候,發現抹完設施同地墊嘅抹布浸到水都黑晒,懷疑係催淚彈殘留物所致喎。不過,周街咁多灰塵垃圾,唔知邊度抹完啲水唔係黑色嘅呢?

斥食環署「太忙」唔清理

譚香文話,其義工昨清理完公園設施後,抹布手套等都泛黑之餘,幾桶清潔用嘅水亦都黑晒。佢仲批評食物環境衞生署可能「太忙」,好少清理公園地墊,有立法會議員亦都向食環署投訴,但都冇人理,睇怕都冇資源喇!譚仲話,其實好多公園都有呢個問題,特別係曾經施放過催淚彈一帶嘅公園,清理地墊嘅時候都出現大量污水。

至於點樣解決公園污水問題,譚就話過兩日會寫信畀食環署,叫政府人員清理受影響嘅公園,同埋化驗吓係唔係催淚彈殘留物。佢仲鬧政府成日呼籲市民注意個人衞生,但政府自己就冇做好,應該諗吓點解決喎。

第一手消息請下載on.cc東網iPhone/iPad/Android/Windows Phone Apps