政情：想學生愛中史 繆家濤：通俗文化幫到手
要挑起學生對中國歷史嘅興趣，若能夠由通俗文化入手，效果可能勝過教科書。油尖旺工商聯會會董繆家濤就對明朝歷史印象深刻，皆因自細就陪媽咪聽粵劇名曲《帝女花》，明朝長平公主同駙馬周世顯嘅故事早就耳熟能詳，亦都引起咗佢探究史事嘅興趣喇。
繆家濤又提到，佢喺加拿大讀書時遇上當地舉辦文化節，當時佢將《帝女花》翻譯成英文，安排朋友飾演劇中人物，點知演出前夕，負責扮演崇禎皇帝嘅朋友意外受傷，佢就惟有自己頂上。佢又話因為飾演呢個角色，令佢感到一國之君雖則權傾天下，亦不能逃過厄運，所以話做皇帝都唔係咁過癮喎。
可加插科技令人物生動
佢又認為，要時下嘅學生對中國歷史產生興趣，唔止靠通俗文化，最好亦善用科技，如可利用擴增實境同虛擬實境，令書本中嘅歷史人物可以躍然紙上，繪形繪聲咁交代史事嘅來龍去脈，並將歷史場景展現眼前。不過要做到咁引人入勝嘅歷史教育方法，就要物色科技公司合作至得喇。