政情：經濟轉差 民怨爆炸 陳茂波去論壇受靶
財政司司長陳茂波下個月發表新一份財政預算案，尋日佢就出席預算案諮詢論壇。不過近日社會動盪，政府止暴制亂無力，本港經濟受挫，陳喺論壇上頓時變成箭靶，被出席論壇嘅市民怒插冇誠信、自相矛盾、消費市民負面情緒等，有市民更質問佢點解唔派錢，係咪淨係撐政府先有錢收咁話。市民怨氣咁大，政府責無旁貸，陳作為問責高官，畀人鬧爆都走唔甩o架喇。
被斥消費港人負面情緒
陳茂波尋日喺預算案諮詢論壇上面對在場人士種種質疑，其中有從事銀行工作嘅市民以誠信係銀行最重要嘅核心價值作比喻，話就算利息幾高都好，冇誠信嘅話就唔會有人投資，批評政府冇誠信，無論推出幾多民生紓困措施，都難以挽回市民信心。
有人又批評，陳早前聲稱本港經濟差係因為受到修例風波影響，但當外國評級機構調低本港評級時，陳又話係受到外來經濟影響，質問陳係咪自相矛盾，消費港人嘅負面情緒，以達到政府政治工作。市民仲質疑政府財政支出分配，唔明白點解政府會打算資助海洋公園逾百億元，而大學等機構預算就未有增加，甚至被削減，質問陳係咪要撐政府先有錢收。
此外，場內亦有唔少觀眾關注預算案究竟會否全民派錢，其中有人就建議全民派錢一萬元，直言︰「錢係我哋嘅，唔係政府o架！」又問陳茂波「N無人士」同啱啱畢業嘅大學生有咩得益，政府有資源嘅話，如想大家開心，點解唔派錢畀市民去做番啲開心嘢。另亦有市民鬧爆政府，批評政府喺過去大半年處理修例風波嘅手法唔掂。陳今次真係中晒箭喇。
驚派錢派得衰 市民仲嬲
陳回應係咪派錢時就話，資源運用係要按照社會唔同範疇分布，唔會將唔同方面嘅調撥置於對立面，但就承認係需要作取捨，又話派錢派得少同論盡嘅話，市民可能仲嬲，總之唔可以輕率。而面對市民嘅怨氣，陳亦都有認衰，話政府過去一年有犯錯嘅地方，問責團隊會深切反省同吸取經驗，往後會記住市民嘅提醒，仲承諾會做得更好。不過真係信不信由你喇。