政情：預算案諮詢會 余德寶擬杯葛
新一份《財政預算案》喺下月公布，政府連日來都邀約各黨派會面做諮詢，見完啲政黨之後就到區議會喇！聽聞財政司司長陳茂波（波叔）將喺下周三邀請十八區區議會正、副主席會面，依家民主派取得十七區區議會嘅主導權，早前佢哋就杯葛由政務司司長張建宗主持嘅地區簡介會，唔知嚟緊波叔又會唔會步張建宗後塵慘食檸檬呢？
唔想做民意政治騷
話說波叔日前去信十八區區議會正、副主席，邀請佢哋出席《財政預算案》嘅諮詢會，聽講到時係會面兩個鐘。據了解，民主派仲傾緊會唔會出席諮詢會，同埋到時會提出乜嘢建議同訴求，至今仍未有共識。但油尖旺區議會副主席、公民黨余德寶接受查詢時，確認有收到相關諮詢會邀請，而佢個人計劃杯葛諮詢會，解釋原因唔係情緒問題，而係政府大半年都未有聆聽民意，唔想成為所謂政府嘅民意政治騷，覺得冇意思，所以唔想去。
上次張建宗主持嘅地區簡介會，最終泛民認為係做騷而杯葛，逾四百名區議員，只得四十人出席。今次波叔邀請十八區區議會正副主席，合共有三十六人，唔知到時有幾多人出席呢？