政情：草案圖繞內會 胡志偉批政府管治失方寸
勞工及福利局局長羅致光日前承認意圖將涉及增加產假嘅條例草案繞過內務委員會，交付人力事務委員會的處理方式係「先斬後奏」。民主黨立法會議員胡志偉尋日出席電台節目時，批評羅致光嘅做法反映政府管治失去方寸，而自由黨黨魁鍾國斌就認為延長產假法案本身冇太大爭議，如果政府承諾呢種做法只此一次，下不為例，就有討論餘地。
胡志偉話有關動議突如其來，連政府內部都冇討論過，反映政府管治上失方寸，喺目前社會對政府信任度如此低，好易令人質疑政府咁做別有用心，又話今次和上次繞過修訂《逃犯條例》的法案委員會，同樣是不可接受，擔心政府把爭議內容繞過法案委員會將成為先例，但佢相信今屆會期內，立法會能成立相關法案委員會處理並通過草案，但鍾國斌話始終冇一個時間表，難以保證幾時可以通過。
鍾國斌：若下不為例可商量
鍾國斌就認為政府嘅做法相信係因為內會停擺，諗唔到其他方法，純粹係「博一博」，做到更好，做唔到就算。佢話產假法案本身爭議唔大，各黨派都支持，若果因為內會卡住，所有法案都做唔到，對整個社會前進唔係好事。佢又話由於早前立法會大會流會，本周三會繼續討論相關做法，如果政府可以保證繞過內會嘅做法下不為例，而又對社會整體有益，佢認為「可以傾吓」。