政情：彭長緯斥港台偏頗嘥公帑 促議員否決撥款

彭長緯喺信中批評年耗十億元公帑嘅港台，節目質素每況愈下，收視率長期偏低，市民對港台時事節目嘅投訴有增無減，佢認為唔應該增加撥款，反而應刪減劣質時事節目，減少浪費公帑，希望立法會否決有關撥款，仲要求政府重新檢討港台作為公營廣播機構嘅功能同角色，透過資源重新分配，令公帑用得其所。

投訴大增 仇警態度惹反感

佢仲話關注組自去年十月起，已間接或直接向港台同監管機構提交逾萬宗投訴，大鬧港台播放嘅時事節目涉大量抨擊政府同警方，美化示威者暴力等，質疑港台報道「偏頗」、「不持平」、造成「社會分化」。佢又指曾有港台記者喺警察記者會上對警員抱仇視態度，亦都有港台記者在現場報道期間醜化警察執法行動，行為令公眾感到反感。

公營機構 竟大力抨擊政府

港台顧問團早前去信邱騰華，要求增加港台撥款同加快重新規劃大樓計劃，仲話因修例風波嘅採訪，港台預算超支五百萬元，而港台作為公營廣播機構，政府有責任因應港台發展需要增撥資源，當時建制派議員已狂轟、大鬧港台製作成本高、收視率低、立場偏頗。建制派議員先前仲批評，本身應該宣傳政府政策嘅港台，近幾年仲要變成大力抨擊政府，重申港台如做唔到應有功能，就應該檢討吓有冇存在必要啦！商經局之前就回應話，港台有足夠資源，應付運作需要。

其實咁多建制派議員狂轟港台不是，加埋政府有關部門又覺得唔需要增加撥款，依家彭長緯加多腳，特登去信建制派「班長」廖長江，擺明就係要建制派阻止增加港台撥款，咪當立法會係提款機，甚至係催促政府改革港台，睇嚟廣播處長梁家榮要好自為之嘞！