中環出更：鄭若驊止暴得把口 學者轟庸碌無能
反修例風波持續逾七個月，港府止暴制亂無方，被指係「避政司司長」嘅律政司司長鄭若驊舊年十一月喺英國倫敦公幹時遭示威者包圍，混亂中狼狽跌倒致左手腕脫臼兼骨折。佢尋日出席二○二○年法律年度開啟典禮時，其左手未見有任何包紮。佢喺典禮致詞時話亂局下暴力橫行，破壞行為猖獗，係「暴力統治」而唔係法治。有學者認為鄭作為律政司司長，僅簡單描述亂象，絲毫冇反思自己就係製造亂象嘅人，又無實質方案解決，狠斥鄭「庸碌無能」，空談止暴制亂。
鄭若驊喺致詞中提及，香港舊年經歷咗動盪不休同極之艱難嘅日子，好多香港核心價值飽受攻擊，更提及社會暴力猖獗，但就話若只強調個人權利而不顧及守法，就很容易變得自以為是，只着重自己權益，漠視別人同社會整體權益，社會好容易陷入紛亂。
佢又提到喺亂局下暴力橫行，破壞行為猖獗，呢啲係暴徒統治而唔係法治，而為免有警務人員喺互聯網平台被起底同滋擾，高等法院頒令繼續執行相應嘅臨時禁制令，指違法行為冇可能促進同維持法治，而干犯呢類罪行嘅人，稱為「罪犯」亦不為過。
檢控速度緩慢 只懂卸責
理工大學專業及持續教育學院講師陳偉強話鄭若驊似乎完全冇自我反思，僅僅描述亂象，忽視自己嘅責任。陳偉強話自六月反修例事件至今，檢控速度緩慢先導致今日嘅局面，相反鄭將所有責任推去示威者身上，指摘暴力示威者固然無錯，但同時冇反思自己不足，狠斥對方「庸碌無能」，空談止暴制亂。
卓妮