中環出更：中國人講意頭 連卓鋒：電子利是難取代利是封
仁愛堂日前以冬日仙境為主題舉行周年慈善餐舞晚會。儘管會場布置儼如藍冰天堂，但香港嘅氣溫仲係相當暖和，仁愛堂主席連卓鋒都話這個冬天不太冷，就算剛啱過咗嘅節氣「小寒」，亦感覺唔到北風嘅腳步，似乎全球暖化嘅現象，日趨嚴重，唔想將來無咗冬天，大家就要積極響應節能減排。
為咗環保，鼓勵市民利是封循環再用，電子利是更加連利是封都節省埋，但連卓鋒覺得中國人過年好講意頭，必須向對方親手遞上紅彤彤嘅利是，先至能夠充分表達鴻運當頭嘅美好祝願。佢又話利是封雖難取代，但係佢近年所派嘅利是，唔會印上年份、生肖或姓氏，以免防礙利是封留待來年再用嘅機會。總理李悅琪亦有類似見解，最近就透過網購，入咗一批具有刺繡圖案嘅絨布利是封，期望呢批絨布利是封將來落入新物主手上可以物盡其用，用嚟盛載碎銀或存放小首飾。
從事食材貿易嘅總理黃曉妮留意到近來興起手機外賣程式，送到顧客手中嘅食物，多數採用塑膠盒盛載，做法同當今嘅環保潮流背道而馳。
黃曉妮籲外賣用紙盒
黃曉妮話以前喺美國讀書，當地菜館都係用紙盒嚟盛載外賣食物，不但較採用膠盒來得環保，亦值得香港倣效。
另一名副主席吳鄭慧賢下個月將會冠名贊助一項活動，召集善長用銀紙摺心心圖創世界紀錄。佢話除左含有塑料嘅十元鈔票之外，歡迎善長攜同任何面額嘅銀紙，一齊摺心心，而挑戰世界紀錄嘅創舉得到確認後，參與活動嘅銀紙就會成為善款，用於服務認知障礙症患者嘅公益項目，而總理戴凱倫同金紫荊女企業家協會執行委員張蕙然都期望創舉順利完成。
卓妮