政情：唔使做無殼蝸牛 陳梓維獲臨時議辦
唔使再做無殼蝸牛嘞！區會新丁、油尖旺區議員陳梓維唔使再喺Food Court（美食廣場）同街頭接見市民，事關佢已喺區內覓得臨時辦事處，而且喺前日已低調開張。佢話有瓦遮頭好好多，但遲啲都係要再搬嘅，所以議辦唔使擺太多嘢。
網友教上網搵免費物資
陳梓維前日喺Facebook上載咗議辦嘅門口相，又貼文話有業主願意短租畀佢做臨時議辦，覺得好感動。問佢短租幾耐同租金幾多？佢話合約關係唔方便透露，但租金係合理嘅。相中所見，臨時議辦只有一張摺枱同兩張摺櫈，而呢個Post出街後惹嚟好多網友關注，個別網友問佢議辦有乜需要？有網友話唔好浪費金錢，建議佢喺網上搵免費嘅物資，而佢亦回應話「我都經常上網排免費物品」。
外界對佢印象深刻，其中一樣就係佢手寫嘅政綱，有網友好留意佢嘅議辦招牌，問：「點解仲係手寫字，用電腦Print（打印）啦！」但亦有網民話：「佢呢手字迹最真誠，係選民最愛。」我哋亦問係咪想貫徹佢過往嘅作風？佢話其實諗住做連儂牆喎。