政情：先斬後奏 圖繞內會審產假 羅致光負荊請罪

開會翌日始通知政府內部

羅致光話有關議案嘅措詞係開會前六分鐘先決定，由於時間緊迫，先冇時間作出預告。佢話政府內部對事件唔知情，承認自己當時「先斬後奏」，自己喺會議翌日先通知政府內部，已向特首林鄭月娥等人交代同致歉。

唔單止要同政府認衰，羅致光尋日亦喺網誌就未有事先作預告，向立法會議員道歉，但就解釋自己僅「早」眾人約半小時知道，可以喺符合《議事規則》嘅大前提下，讓法案有機會喺今屆立法會會期完結前完成。

立法會喺上個禮拜四開大會，羅致光喺未有作出預告嘅情況之下提出相關動議，此舉惹嚟唔少質疑，民主派議員當日仲「突襲」成功，提出點算法定人數，最後因人數不足而搞到流會添！唔少建制派議員大鬧泛民阻住民生議程，剝奪婦女權益；但泛民就話並非針對延長法定產假，而係覺得程序公義同樣重要。

其實政府咁急，都係因為內務委員會自上年十月至今都未選到正副主席，冇辦法成立法案委員會審議法案。上屆內會主席李慧琼尋日出席一個活動時就話內會被騎劫，搞到法案委員會未能運作，部分法案冇辦法完成審議工作，當中包括延長法定產假等嘅民生議程，形容羅致光嘅做法係「冇辦法之中嘅辦法」，又話立法會唔可以因為內會而停擺喎。

泛民藉機促撤回有關動議

然而，民主派會議召集人陳淑莊尋晚發表聲明，促羅將其歉意化為行動，撤回有關動議，而政府亦應引以為戒，下不為例。佢強調有關動議明顯有違《議事規則》內明文規定嘅法案處理程序，所有法案要恢復二讀必須同內會主席磋商，並無歧途，又批評羅當日嘅即興動議，猶如「昨日罵民主派『堵路放火』、今日便變臉致歉般輕浮。」佢又話經內會係別無他選，唔係羅口中樂意就跟從，唔樂意就可以唔跟。