中環出更：蘇裕康試過離家出走 籲年輕人多諗後果
近年青少年情緒問題都頗為嚴重，唔少人因一時諗唔開就選擇自殺等。卓妮日前就喺一個公開場合見到九龍樂善堂副主席蘇裕康，佢話細個嗰陣曾試過離家出走，但好彩有朋友幫助，好快就諗通咗，仲話自己係一個凡事諗後果嘅人，呼籲依家年輕人都多諗後果，自然可以渡過眼前難關咁話。
蘇裕康話自己排行中間，上有哥哥下有細佬細妹，而通常最中間嗰個就最容易畀人忽視，或者父母會偏心，中學時自己唔識諗，離家出走後好彩有朋友接濟，期間朋友不斷說服同開解佢，自己都諗「唔通咁就一世咩」，幾個月後諗通咗就返番屋企喇，到依家遇到問題，佢都會不斷問自己「聽日會點」，想像吓聽日咁話，呼籲年輕人都唔好太短視、唔諗後果，而好多嘢都係因果關係，諗到因果做嘢就會收斂啲，正所謂三思而後行嘞！佢太太都話呢刻輸贏唔緊要，年輕人應將眼界放遠啲，加上佢信佛，佛教有句說話係「因上努力，果上隨緣」，盡全力做事但唔好太執着輸贏。
莫文韜：社會太集中喺數字上
轉個頭見到主席楊小玲（Jackeline）同常務總理莫文韜（Michael），Michael就奉勸年輕人唔好太着重成績，成績唔好就好似世界末日咁，社會好多嘢太集中喺數字上，就會唔開心！遇到問題都好視乎個人點諗，有問題應該搵方法去改變。Jackeline就大讚Michael叻仔，全因Michael將爸爸嘅廠電子化，令效益變好，份人好識變通，而識變通好多困難都變冇困難喇！Jackeline都一樣，廿幾年前做美容生意，競爭非常大，但就諗到治療暗瘡，仲笑話「鑽」唔係唔啱，但唔係鑽牛角尖，而係鑽研吓點樣搵出路喎。
陳李玉佩：無論咩事 都搵到出路
副主席陳李玉佩同丈夫、常務總理陳達華都喺現場，陳李玉佩就講自己做室內設計同裝修生意，而佢好多朋友都係做生意，算係前線接觸經濟嘅一批，最近都影響好大，但就話香港人好特別，好有生命力，如九七年移民潮走咗一批人，之後又返嚟，經歷金融風暴、沙士等，無論經濟點差，有乜嘢大瘟疫都好，香港人都好似自己有技能咁，可以從中搵出路，相信年輕一代都一定得。
卓妮