政情：羈留者投訴紙飯盒凍冰冰 黃傑龍：係環保餐具

Simon話未被法庭定罪嘅羈留人士相比已定罪嘅人士，其中一樣較高嘅自由度，簡單啲講就係容許叫外賣，千幾個被羈留人士入面大約有二百個會揀食「私家飯」，有三間餐廳經申請可以提供，而且選擇都唔少，餐廳直接同被捕人士家人交易，由家人直接去餐廳度落單同畀錢。

運送及安檢需時致變冷

點解啲飯盒凍晒？Simon話係有原因，亦好難避免，以早餐為例，由於三間餐廳都要準時喺朝早七點將二百個餐送去收押所，煮幾百個早餐當然需要半個鐘，整好送過去，最近嗰間步行要二十分鐘，佢估計都係用車運送，送餐人員到達後需要做安檢，然後先可以推啲餐入去收押所，再由署方人員檢查每盒飯有冇違禁品。佢話可以想像個過程都唔會快得去邊，相信送到去被捕人士手中好難唔係凍晒，所以佢特別提醒收押所主管，盡量快手啲做檢查，希望盡快送到餐畀被捕人士享用喎。