政情:熱夜急增 林超英嗌恐怖

受到全球暖化嘅影響,冬天係咪再係冬天?天文台早前公布舊年係香港有紀錄以嚟最暖嘅一年,就連天文台前台長林超英都覺得最恐怖嘅數字係熱夜數目,再係咁落去,去到世紀中,就會整個夏天晚晚熱夜,到時香港會話:「問你死未!」

林超英日前喺Facebook貼文,佢話舊年嘅熱夜有四十六日,即係個半月,而佢少年時期,每年熱夜數目只有零至三日,唔難捱,但依家就慘嘞,尤其係窮人。佢話更恐怖嘅係熱夜數目增加嘅速度,天文台以前預計熱夜數目大概用六十年時間升到二十一世紀中嘅八十日左右,但依家先過咗二十幾年,升幅已經超過預計一半,即係話繼續落去,世紀中甚至唔止八十日,隨時多達三個月,即係整個夏天晚晚熱夜。

香港就快冇冬天 籲大眾減排

有網友留言話可能呢個冬天,「寒冷日數有機會係零,真係唔想你(林超英)之前預測到,但又預計到」。點解咁講?事關喺○八年時任台長嘅林超英已預測香港最快二○二○年冇冬天呀!佢嘅預測中晒。

冇冬天,熱夜急速增加,點算好?林超英就呼籲為咗世界、香港同自己,市民要立即減少排放不必要嘅二氧化碳、慳電、慳煤氣或石油氣、慳水、少開車慳電油同慳錢,唔好買多餘消費品,仲要減少廚餘,咁樣等同減少溫室氣體沼氣等等,仲話每人一小步,人類一大步!

第一手消息請下載on.cc東網iPhone/iPad/Android/Windows Phone Apps