中環出更：為避惡蚊 狄志遠新界搬九龍
蚊對人類起居構成滋擾，又會傳播疾病，遺害可以好大。家庭與學校教育事宜委員會前主席狄志遠（Dick）係怕蚊之人，為免自己同家人成惡蚊開餐嘅對象，決定遷離由新界搬去九龍居住，仲要揀住大廈頂樓。
阿Dick喜歡喺天台栽種植物，不但有留意花盆積水，又有種植驅蚊草，防蚊孳生嘅工作可謂做到足。雖然年中大多數日子都可以做到蚊蹤杳然，但間中仍有蠱惑嘅惡蚊，匿藏喺草葉暗角，會趁佢欣賞暮夜燈火時乘機偷襲，又或者摸黑闖入寢室喺佢耳邊轟鳴。佢話若果附近有地方適合蚊蟲孳生嘅話，不斷繁衍嘅惡蚊就會越境來犯，所以佢每當上天台清理積水，範圍亦會包括毗連嘅鄰居天台，仲話要行多一步，清理工作連自家周邊都兼顧埋，防蚊先較有效果。
梁冬陽：蚊怕水宜噴於衣物上
嗰晚係香港高等教育協會舉辦嘅慈善晚會，目的係協助聯合國基金會屬下嘅籌款機構Nothing but net，為非洲家庭提供藥浸蚊帳以防瘧疾，協會嘅理事會會長王夢廸同副主席李皓君當然有出席。
梁冬陽醫生喺晚宴中話瘧疾嘅致命率極高，但幸好香港屬已發展地區，每年嘅瘧疾個案多處於兩位數字，然而為免染上其他同蚊有關嘅疾病如登革熱或腦炎，防蚊措施唔能夠掉以輕心，尤其係幼童因新陳代謝快，體溫同呼吸中嘅二氧化碳都較高，係相當「惹蚊」嘅因素。至於使用蚊怕水，佢認為與其噴喺皮膚，不如噴喺衣物，理由係出汗會沖淡藥效，況且含化學成分嘅蚊怕水，有傷皮膚或引起敏感之虞。
瘧疾肆虐非洲 黃僐橋捐蚊帳
晚宴籌委會主席黃僐橋話非洲係瘧疾重災區，當地人往往因蚊咬而喪命，因此佢哋嘅初步目標係為當地人提供一千個浸過藥水嘅蚊帳。收藏家沈墨寧認為此舉功德無量，慷慨捐出名錶拍賣以支持今次活動。
卓妮